|
熱門:

2017年10月6日 即巿股評 港股直擊

【盤房來料】內銀唞氣又換內房汽車接力

美股再創新高,預咗港股中秋不快落,而缸邊友會好快樂,港股假後市造好,本周三個交易日上升。恒指今早高開274點,創下28626點高位,順利升越2015年高點,更創自2007年12月以來新高。不過開市價已經係半日高位,高開低走,升幅一度收窄至只有48點,見28427點半日底位。恒指中午報收28480點,升101點;國指則報收11480點,升83點。

騰訊(00700)再創353.6元新高,半日報收352.4元,升幅不足1%。得到燈神反向祝福嘅友邦(01299)升1.2%,同燈神行相反方向,果然係百發百中。至於假期前表現強勁嘅內銀股,今日升勢放緩要唞唞。大笨象(00005)公布完派第三季息反而唔識行,今日仲要逆市跌0.3元,不過阿Man相信好戲在後頭,大笨象始終受惠息口趨升,加上花旗放寬對金融業管制,大笨象遲早變小飛象,待下周北水回歸,大笨象就係變身之時。

至於新丁眾安(06060)有鑽石股東組合係唔同,雖然明明估值高到上天花板,但股價照樣可以飛去外太空,假前股價急升兩成,只係用咗兩日時間收集散戶嘅貨即開車。今日一度又近升兩成,創96.1元上市新高,半日收91.6元,升幅仍有14%,睇嚟要變紅底股話咁快。至於其大股東之一嘅平保(02318)亦水漲船高,創64.4元新高,半日升1.5%,報收64.1元。

內銀股唞氣,資金又翻炒內房股同汽車股,鋤弟會嘅成員融創(01918)同恒大(03333)齊齊破頂,半日分別升4.8%及2.4%。同屬大劉有份落part嘅佳兆業(01638)亦升7%,半日報收6.53元,睇嚟好快又創新高。至於其他內房股普遍上升,之前提過嘅華南城(01668)半日升7.2%,估值仍屬低水,升穿2.5元企穩,下一目標3元。

汽車股亦有商捧,但以製造商表現較佳,得到大摩祝福嘅吉利(00175)又破頂,半日升5.4%,係升幅最大藍籌股。比亞迪(01211)創7年半新高,半日升2.1%,大摩話睇100元,信不信由你。

濠賭股逆市跌,澳門旅遊局數字顯示,金周首四天(10月1日至4日)訪澳旅客共有46.86萬人次,按年下跌2%。其中,內地客有36.34萬人次,按年跌5.1%。不過濠賭股之前升咗咁多,借個機會回吐好正常,中線仍睇好,始終今年全年大豐收。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。